Jak de Priester

By | Oktober 11, 2017

1. Wat onthou jy van jou Afrikaanse taalonderwysers op skool?

Ek het twee Afrikaanse juffrouens in my hoërskool loopbaan gehad, juffrou Fouché en juffrou Venter. Hulle was altwee liewe mense met ’n groot liefde vir Afrikaans as vak. Beide die onderwyseresse is/was bitter lief vir die letterkunde en het baie moeite gedoen met digkuns. Ek onthou dat ek al van daardie jare die kuns van digkuns bewonder het en ook self begin skryf het. Hulle het definitief ’n liefde vir Afrikaanse letterkunde by my gekweek.

2. Hoekom het jy en jou vrou besluit om julle kinders in ’n Afrikaanse skool te plaas?

Ons Moedertaal by die huis is Afrikaans.

3. Hoekom is Afrikaanse onderrig vir jou belangrik?

Afrikaanse onderrig is vir my belangrik omdat ek glo ’n mense in jou Moedertaal soveel meer gemaklik is en dat jou brein net soveel meer natuurlik alles verstaan en begryp. Maar so ook vir die Engelse kind, dieselfde geld vir al die tale in die wêreld.

4. Hoekom sing jy in Afrikaanse eerder as in Engels?

Ek het lank gelede, in die dae van Johannes Kerkorrel toe ek ’n student was, lief geraak vir die Afrikaanse taal in die vorm van musiek. Toe ek in Londen gewoon het in 1999 – 2000, het Afrikaanse musiek soveel wortels gebied in ’n vreemde land en ek het geweet as ek terugkom huis toe wil ek in Afrikaans musiek skryf en sing. Maar ek besef na al die jare, dat dit my tot die Afrikaanse mark beperk.

5. Wat is jou gunsteling Afrikaanse woord?

Melkskommel, liefdesliedjie en troebadoer